Act 28 | DOB | STEP | 'Enega 'agayo'oya'a bwa'a yadayadanaya, ga salu nina 'ana tomiyanao sisimana 'emaya 'aene salu nina 'ana esana Melita.

Acts 28

'Ima miya Melita 'ena

1 'Enega 'agayo'oya'a bwa'a yadayadanaya, ga salu nina 'ana tomiyanao sisimana 'emaya 'aene salu nina 'ana esana Melita. 2 Ta me salu nidi siobobomema sinabwana, ga kaiwe simu'ena, ta maibo'ama sibwauyema ga 'asiyasiyata, manuna 'i'usa'usana, ta gogai wate.

3 Ta Paulo kaiwe 'ielaganinama, ga kaiwe 'ena 'isa'ubaledi, ta yaiyai manuna ga mwata bolausa 'iapwesama, ga Paulo nimana 'igo'ina.

4 Ta ni'atu me salu si'itena Paulo nimanaya mwata 'itabetabe, ga sieonaona taudimo, sigwae, “Ona'ai'aila, tai gote toloemwawasa, be nigeya sawesawenaya loinega taunamo 'i'etoseyei. 'Anabwa'ayoi damanega 'idenama dabalaya, ta wada 'ita mwata 'igo'ina.”

5 Ta Paulo mwata nina 'i'ausepalena 'awesabelulu solanaya, ta nigeya 'elouya 'ilotolotoo. 6 Ta me salu nidi Paulo siduneduneyei ta sinuwena 'aene nimana 'ida seseya, nai 'ida tai be 'ida mwawasa, ta siyamwayamwana ga Paulo nigeya wate 'ebweu to'ase 'i'ewa'ewa, 'enega 'idi nuwanuwa sisa'u gelasena, ta sigwae, “Tai nina 'ebweu yaubada.”

7 Salu nina 'ana 'inapwana 'ana esana Pubiliasi, ta 'ina 'asa sena nina 'ena 'alugu selabenaya, ga Pubiliasi nina 'i'au'ewema, ga 'asiyata 'etoi 'ediya 'i'ita'i'isi 'ai'ailima.

8 Ta tuta nina 'ena Pubiliasi tamana anuwaya 'i'eno'eno ma ina le'oasa, ta 'ina le'oasa yaiyai be gamwapilipili. 'Enega Paulo 'ilugu 'ena, ga manuna 'isidasida Yaubada 'ena, ta oona 'igitoona ga 'igiebobo'anena.

9 'Enega me salu maibo'adi taudi ma idi le'oasa simai Paulo 'enaya, ga taudi wate 'igiebobo'anedi. 10 'Enega oboboma yauna si'ebwa'ema, ga 'ima tuta gelu 'ena, 'ama 'abwaga sawesawemaya sieusena.

Melitega ga Loma

11 Ta nawalae 'etoi sigumwala ga Melitega 'agelu Loma manuna, ta 'ima waga Alekisanidela wagana, matanaya 'ana dayagi didiluwaluwa me'olotodi, ta waga nina, lowa nawalae gogai nidi 'ediya, salu nina 'ena 'iyamwayamwana, ga 'ana laba yagila sinabwana 'ilosa'u.

12 'Enega 'atupa ga Sailakiusa 'ena 'aulita, ga 'asiyata 'etoi 'amiyami. 13 Gote 'ena 'asakowasi Legiami ga 'aulita. 'Iulisina ga yalasi 'itowama, 'enega 'atupa limana, ta 'apilipili, ga 'asiyata 'eluwa namo ga 'alugu Putioli.

14 Putioli 'ena 'aina toekalesiyao 'alobedi, ga sibwauyema 'idi anuwaya, ga 'ediya 'amiyami 'asiyata sebeni 'ediya. Ga gote 'enega 'atauya Loma manuna.

15 Ta toekalesiyao nidi Loma 'ena alema sinononaya, ga simai 'edaya siaesotema sena 'Ebegimwane, 'ana esana Apio be Anuwa 'Owaga 'etoi 'ediya. Ga tuta nina Paulo gosemao nidi 'ilobedi, Yaubada 'ena 'ilokagutoki, ta 'i'atepatu. 16 Gote 'enega 'atauya ga Loma 'ena 'aapwesa, ta tolosaiyao Paulo sitagwalena be 'ida miya dumaduma, be 'ana to'ita'i'ita tolosaiya 'ebweuna namo tuga.

Paulo 'ina guinuwa Loma 'ena

17 Ta 'asiyata 'etoi sigumwala, ga Paulo me Yudia 'idi toanuganao 'ibwau egogonedima, ga 'ieonedi, “Tasigwao, 'abo'agu nigeya 'ebweu to'ase to'umalina 'ida bodao 'ediya yaguiguinuwe, nai 'ida bubuna tubudao 'ediyega yale'oale'oai, ta wada 'ita, Yelusalema 'ena si'ebwayaegu me Loma 'ediya ga deliya sisa'ugu. 18 Ta 'igu etala mulinaya me Loma nidi nuwanuwadi be sida li'amigu, manuna nigeya 'ebweu 'igu to'umalina silobaloba, be 'aene manuna sida loemwawasigu, 19 ta me Yudia sigewana gabana 'ena 'aene geya'abo sili'ali'amigu. Gete 'alena yasida Sisa 'ina etala manuna; ta nigeya 'aene 'ida bodao yae'ewadi, 20 Ta esi taudi 'idi e'ewa 'eguya manuna yabwauyemima be ta'awagwae. Ona'ai'aila, 'abo'ada me Isileli taemiemisa 'aene 'ada 'etoseyana Yaubada 'enega 'ida apwesa, ga emisa gete manuna deliya sisa'u luguyegu.”

21 Ta me Yudia nidi sigwae, “'Abo'ama nigeya 'ebweu Yudiaega leta manuyo 'alobaloba, nai gosedao bada simeemai nigeya sisimasimaneyo 'aene 'oyo to'umaliyo. 22 Ta esiya nuwanuwama 'ada nono 'emuyega to'ase 'imu nuwanuwa nidi, manuna sena yauyaudi tomoteninao 'imu boda ekalesiya si'awa to'umaliyena.”

23 'Enega 'asiyata siupaena, ga boda yaudi siegogonama Paulo 'ina anuwaya, ga gonegonega ga 'ana laba 'iboi, 'ediya 'iloguguya, Yaubada 'ina etoloina manuna, ta Mosese 'ina loina 'enega, be palopitao 'idi onao 'ediyega, 'ie'itedi Yesu manuna, ta 'itoona be 'aene 'ida gienuwa sabwalenidi. 24 'Enega 'aidi siemisena ta 'aidi sipa'ala. 25 Manuna 'idi nuwanuwao dumadumana be dumadumana, 'enega sideli sawala.

Ta Paulo 'ina ona 'ana 'ebe losalowa 'ediya 'igwae, “Yaluyaluwa Tabuna 'ina ona tubumiyao manudi ona 'ai'aila, nate palopita Aisea 'awanega 'ionaedi.

26 ‘'Utatauya be tomota nidi 'ueonadi: Ma'etamo waenoenono, ta geya'abo nuwami 'isabwasabwalena. Be wate wadunedune tuga, ta geya'abo sa'i wa'ita'ita. 27 Manuna tomota getedi 'idi nuwanuwao si'elokwani, ga tenadi situi, ta wate matadi sikebo. 'Abona nai matadiyega si'ita ta tenadiyega sinono, be sinuwa sabwalena, be 'eguya sida sanaila, be yagie bobo'anedi.’ ”

28 'Enega Paulo ona nina wate 'iloeposeyanena, 'igwae, “'Enega wada mwalatoni 'aene Yaubada 'ina simana 'ada 'etoseyana, manuna ni'atu 'ietunena taudi nigeya me Yudia 'ediya, be taudi sa'i sida nono.” 30 'Enega Paulo 'ina anuwa gote 'ilowagena 'ena 'imiyami yakwala 'eluwa 'ediya, ta tomota yaudi 'ina anuwaya silugulugu be ma'enao siegosigosiyana, 31 ta Yaubada 'ina loina manuna 'iloguguyedi ta 'ie'ie'itedi 'Inapwana Yesu Keliso manuna, ta nigeya 'ebweu yaita 'itoo be 'ina loguguya 'i'etobode.